Luke 16

1Ette Yesu hidofe hijo do hejufak illohonyie, “Owuon ifa lobo hasamani ho tihoni lolotoŋita hirro innohonyie, etisiahak ifa huwo hijo etihara hatoŋitani ibariti innohonyie. 2Niya ette hasamani helilloŋu inyeja eijo do honyie, ‘dohonyie nyo ne etira naŋ hirro innohoi? Isiara naŋ ituhutita innohoi, ibe iye inyiak hira hatoŋitani.’

3Ette hatoŋitani lie to wan honyie hijo, ‘Egiem iso naŋ nyo, iyane adumu ettok lalaŋ igem adde tere hanaŋ? Abe naŋ awuon ho golo haromori, eloriri naŋ himimojo. 4Ayien naŋ nyo lahu naŋ hihum anyar honyie huwo lelilloŋu naŋ ahaŋitek hose letiwet naŋ te igem.‘

5Ette hatunani lie elilloŋu huwo illo horosi , niya ette hatunani lie elilloŋu huwo illo horosi illo eittok honyie, ette inyeja hifia lafa lara hitieri hijo, ‘Awak eittok hanaŋ dohoi jai?‘ 6Eijo lie ‘Karajaha inno hiyali hisihe naboite.‘Ette inyie hijo do honyie, ‘Todumu waraga nohoi tohunye da fau kokuak igiorok tomona miet.‘ 7Ette hatunani hijo do lobo, ‘Ara innohoi jai?’ Eijo lie, ‘hisihai nobotie inno geme,‘Eijo inyeja hijo, ‘Todumu waraga nohoi, igiorok tomona hotohunik.‘

8Ette eittok lafa lie honyie mune hatunani lafa lorru nyo egiem inyeja na lanyar, nyo egiama lenyirok ha fau inna no lorru nalagalik binno to huwo innohose agalik durre illo calai. 9Ajo naŋ da hatai, imotiai to kwaite innahatai to ibariti inno fau, nyo lesaha innohoi anyar honyie elilloŋu iye amai nolobe eremik hisoha.

10Lie leleniefita hirro hullo loduhucio odule iso hiniefita inno loluŋa, ojo lolobe eniefita hullo loduhucio, obe iso hidofe inyeja eniefita inno loluŋa. 11Atti lobe iye ifa eniefita ibariti inno fau nalanyar, ŋai iso eiso dohoi ibariti hunna dede? 12Lobe ifa iye eniefita hirro inno lobo tihoni, ŋai iso eremik hiso dahatai hirro inne lara innahatai?

13Obe lobo tihoni eremik higiama do leitaha lohor, kuya oremik aliwari lobotie ette mune lobotie, kuya eremik higiama do lobotie hamai ette miasa do lobotie. Ettalik iye higiama to Hollum iko ibariti.”

14Nafa etiru Farisei hirro hamunok ha arobiya inne daŋ, ette elohitari Yesu nyo omuno isieja gurusi agalik. 15Ette hijo dohose, “Etilibo itai kwaite innahatai do hosiere ho huwo, hati oyien Hollum tajia innahatai. Hirro inno olibo do hosiere ho huwo, orru to hosiere ho Hollum.

16Odule ifa hifahita ho hekilak many ottuni Yoani. Many to nyia ahosiere, arrasa daŋ hitiyana sayye inno Obie no Hollum, ojo huwo tamai arrasa ciama hikoi nohose daŋ ahotuai to golon. 17Hati ofiak iso te ido ho fau halitari adde, ette iso golon to higierita inno hifahita haguasari adde.

18Lolopiaha ho noŋoruo honyie ette ŋayemu nabo hamai eyau inyeja hiyau no roto, ojo lie lalayama hitonoŋoru nolopiaha ho hitololewa, eyau hiyau no roto.

19Owuon ifa lobo tihoni lelecefita boŋojin inne lara sura ojo hidofe ogol to hinyaŋa. Eŋaleta ifa inyeja holoŋitek daŋ. 20Owuon ifa hidofe lobo lolociaŋ lelemimojo lara fure nohonyie Lasaru, lolowuon kwan daŋ ho horroŋon arria ojo lofer daŋ ta mari honyie, 21Awak ifa inyeja hihuhuro ŋiria nolodek da fau ho tihoni hasamani - ojo ŋohe afanu hididala horroŋon innohonyie.

22Nafa loye lolociaŋ lie, ahafari ifa anjillohien oholio honyie aŋhati ha Abramo. Ette hidofe hasamani lie yei ette ŋanuhahini, 23Da mai no hima, towuana nohonyie to hitigiama, ette inyeja hihaf honyiehite ette ŋaigonyu Abramo alamarai leletole Lasaru to suhe na Abramo.

24Ette inyeja yio binno eijo dohonyie, ‘Monye Abramo, tomehini da hanaŋ, ifahu Lasaru, hawoŋ hehumak hafialai honyie do hifioŋ hetiliha ŋadief hanaŋ, nyo awuon naŋ tamai nolowulo binno.’

25Hati eijo Abramo, ‘Hito, iko ihuma higigil nafa helewuar iye, ewuon ifa iye iko hirro inno olibo, ojo Lasaru orrumu hirro inno lepal. Hati iyane, elobia inyeja ejo iye ewuon ho hitigiama. 26Obe lara inne hamai, hati owuon iwure to hiji hatai hijo hotobiaŋa luha lalaŋu telle, ejo iyohoi ebe lelaŋ adde hatai.‘

27Ette hasamani lie hijo, ‘Atana naŋ iye, Monye Abramo, ifahak inyeja da haji ho monye hanaŋ 28Nyo awuon naŋ ho ilasira miet - anyar lohu inyeja hisor isieja, abaŋ naŋ hijo eremik isieja ŋafanu tamai norru.’

29Hati eijo Abramo, ‘Owuon isieja ho Musa ojo hekilak; isiara isieja hetira dohose.’ 30Ette hasamani lia hitiraŋ, ‘Obe, Baba Abramo, ohu ida lobo tihoni do hose tere hayok, eremik iso isieja hilloito.’ Hati eijo Abramo do honyie, ‘Lobe isieja etira do Musa iko hekilak, obe iso isieja eremik huruk hiram no huwo ille lebuhu to yei.’”

31